ye KHum subu ye jam ye paimana kuchh nahin

ye ḳhum subū ye jaam ye paimāna kuchh nahīñ

saaqī tire baġhair ye mai-ḳhāna kuchh nahīñ

majnūñ hazār dasht meñ chillā.e haa.e haa.e

dīvāngī baġhair hai dīvāna kuchh nahīñ

kyā jāniye ye 'ishq hai ātish ki jū-e-shīr

tujh ko jo maanā apnā to phir jaanā kuchh nahīñ

rakh bhejiye lifāfe meñ hoñToñ kā ek lams

is ke sivā faqīr kā nazrāna kuchh nahīñ

terī adā-e-sharm-o-hayā dekhne ke baa'd

bādal meñ chhup ke chāñd kā sharmānā kuchh nahīñ

ye zindagī thī pyaar kā sadqa adā huā

jānāñ tumhāre pyaar meñ mar jaanā kuchh nahīñ

dil kā churānā jurm hai lekin mire huzūr

mujrim agar haiñ aap to jurmāna kuchh nahīñ

saaqī kī kaj-nigāhiyāñ be-vaj.h to nahīñ

shāyad mire savāl meñ rindāna kuchh nahīñ

ye KHum subu ye jam ye paimana kuchh nahin

saqi tere baghair ye mai-KHana kuchh nahin

majnun hazar dasht mein chillae hae hae

diwangi baghair hai diwana kuchh nahin

kya jaaniye ye 'ishq hai aatish ki ju-e-shir

tujh ko jo mana apna to phir jaana kuchh nahin

rakh bhejiye lifafe mein honTon ka ek lams

is ke siwa faqir ka nazrana kuchh nahin

teri ada-e-sharm-o-haya dekhne ke ba'd

baadal mein chhup ke chand ka sharmana kuchh nahin

ye zindagi thi pyar ka sadqa ada hua

jaanan tumhaare pyar mein mar jaana kuchh nahin

dil ka churana jurm hai lekin mere huzur

mujrim agar hain aap to jurmana kuchh nahin

saqi ki kaj-nigahiyan be-wajh to nahin

shayad mere sawal mein rindana kuchh nahin