یہ خم سبو یہ جام یہ پیمانہ کچھ نہیں

یہ خم سبو یہ جام یہ پیمانہ کچھ نہیں

ساقی ترے بغیر یہ مے خانہ کچھ نہیں

مجنوں ہزار دشت میں چلائے ہائے ہائے

دیوانگی بغیر ہے دیوانہ کچھ نہیں

کیا جانیے یہ عشق ہے آتش کہ جوئے شیر

تجھ کو جو مانا اپنا تو پھر جانا کچھ نہیں

رکھ بھیجئے لفافے میں ہونٹوں کا ایک لمس

اس کے سوا فقیر کا نذرانہ کچھ نہیں

تیری ادائے شرم و حیا دیکھنے کے بعد

بادل میں چھپ کے چاند کا شرمانا کچھ نہیں

یہ زندگی تھی پیار کا صدقہ ادا ہوا

جاناں تمہارے پیار میں مر جانا کچھ نہیں

دل کا چرانا جرم ہے لیکن مرے حضور

مجرم اگر ہیں آپ تو جرمانہ کچھ نہیں

ساقی کی کج نگاہیاں بے وجہ تو نہیں

شاید مرے سوال میں رندانہ کچھ نہیں