یہ کن مکانوں سے مجھ کو ہوا گزارتی ہے

یہ کن مکانوں سے مجھ کو ہوا گزارتی ہے

حد گمان سے کچھ ماورا گزارتی ہے

میں جرم کرتا چلا جا رہا ہوں اور مری روح

بہ اختیار مری ہر سزا گزارتی ہے

تو اس کا لمحہ بھی جی لے اگر تو مر جائے

وہ ابتدا سے تری انتہا گزارتی ہے

یہ کیا طریقۂ ہستی ہے زندگی تیرا

بحال کر کے مجھے گم شدہ گزارتی ہے

تو کیا وہ شکل ابھی پہچانتی نہیں خود کو

جو مجھ کو آئنہ در آئنہ گزارتی ہے

تمام ہونا یہاں آرزو سے ہے ثانیؔ

پہ آرزو کو یہ کس کی رضا گزارتی ہے