ye kis maqam pe le aae raste mujhko

ye kis maqām pe le aa.e rāste mujh ko

ḳhud apnā dhyān bhī aa.e na dhyān se mujh ko

is intizār meñ huuñ shāḳh se utāre koī

tumhāre qadmoñ meñ le jā ke Daal de mujh ko

pukārtā hai mujhe koī in havāoñ meñ

daraḳht shāḳh se apnī utaar de mujh ko

mujhe milā kabhī apne bichhaḌne vāloñ se

savāl tere ta.iiñ kuchh haiñ pūchhne mujh ko

mujhe bhī dekhnā hai un falak-zamīnoñ ko

havā-e-shām kabhī apne saath le mujh ko

bulandiyoñ pe hai pastī kī ek gahrī ġhaar

ai merī zaat tū rakhnā sañbhāl ke mujh ko

ye kis maqam pe le aae raste mujh ko

KHud apna dhyan bhi aae na dhyan se mujh ko

is intizar mein hun shaKH se utare koi

tumhaare qadmon mein le ja ke Dal de mujh ko

pukarta hai mujhe koi in hawaon mein

daraKHt shaKH se apni utar de mujh ko

mujhe mila kabhi apne bichhaDne walon se

sawal tere tain kuchh hain puchhne mujh ko

mujhe bhi dekhna hai un falak-zaminon ko

hawa-e-sham kabhi apne sath le mujh ko

bulandiyon pe hai pasti ki ek gahri ghaar

ai meri zat tu rakhna sanbhaal ke mujh ko