یہ کس مقام پہ لے آئے راستے مجھ کو

یہ کس مقام پہ لے آئے راستے مجھ کو

خود اپنا دھیان بھی آئے نہ دھیان سے مجھ کو

اس انتظار میں ہوں شاخ سے اتارے کوئی

تمہارے قدموں میں لے جا کے ڈال دے مجھ کو

پکارتا ہے مجھے کوئی ان ہواؤں میں

درخت شاخ سے اپنی اتار دے مجھ کو

مجھے ملا کبھی اپنے بچھڑنے والوں سے

سوال تیرے تئیں کچھ ہیں پوچھنے مجھ کو

مجھے بھی دیکھنا ہے ان فلک زمینوں کو

ہوائے شام کبھی اپنے ساتھ لے مجھ کو

بلندیوں پہ ہے پستی کی ایک گہری غار

اے میری ذات تو رکھنا سنبھال کے مجھ کو