یہ کس نے کہہ دیا ہے قصر سلطانی میں رہتا ہوں

یہ کس نے کہہ دیا ہے قصر سلطانی میں رہتا ہوں

میں اپنی ذات میں پھیلی بیابانی میں رہتا ہوں

بہت ہی سادگی سے روز کھاتا ہوں فریب اس سے

پھر اس کے بعد پہروں ایک حیرانی میں رہتا ہوں

میں دن بھر خوب ہنستا ہوں ہمیشہ مسکراتا ہوں

مگر شب بھر میں بزم اشک افشانی میں رہتا ہوں

مجھے جو دشمنوں کے وار سے محفوظ رکھتی ہیں

میں کچھ ایسی دعاؤں کی نگہبانی میں رہتا ہوں

یہ میں نے آزمایا ہے بڑے لوگوں کی محفل میں

میں جتنا چپ رہوں اتنی ہی آسانی میں رہتا ہوں

کسی بھی وقت اشکوں کا بہاؤ کم نہیں ہوتا

میں دریا کی طرح ہر وقت طغیانی میں رہتا ہوں