یہ کس نے یوں اسے دیوانہ وار دیکھا ہے

یہ کس نے یوں اسے دیوانہ وار دیکھا ہے

کہ اس نے اپنی طرف بار بار دیکھا ہے

مرا مذاق نہ پوچھو بہار کو میں نے

ہٹا کے پردۂ رنگ بہار دیکھا ہے

جہاں سے شوق نے سجدوں کے بعد اٹھائی جبیں

وہیں پہ نقش کف پائے یار دیکھا ہے

دکھا رہی ہے جو دیوانگئ عشق مجھے

کسی نے رہ کے کبھی ہوشیار دیکھا ہے

مری امید مسرت پہ کیوں خفا ہو تم

بنا کے غم کو کبھی خوش گوار دیکھا ہے

بجا کہ اک ہمیں اہل نظر نہیں لیکن

کسی نے یوں تمہیں دیوانہ وار دیکھا ہے

کراہنے لگی میرے لہو کی اک اک بوند

جب ان کو اپنے لئے اشک بار دیکھا ہے