ye kis wahshat-zada lamhe mein daKHil ho gae hain

ye kis vahshat-zada lamhe meñ dāḳhil ho ga.e haiñ

ham apne aap ke madd-e-muqābil ho ga.e haiñ

ka.ī chehre mirī sochoñ se zaa.il ho ga.e haiñ

ka.ī lahje mire lahje meñ shāmil ho ga.e haiñ

ḳhudā ke naam se tūfān meñ kashtī utārī

bhañvar jitne samundar meñ the, sāhil ho ga.e haiñ

vo kuchh pal jin kī ThanDī chhāñv meñ tum ho hamāre

vahī kuchh pal to jīvan bhar kā hāsil ho ga.e haiñ

ulajhte jā rahe haiñ justujū ke par musalsal

zamīñ-tā-āsmāñ kitne masā.il ho ga.e haiñ!

'nabīl' āvāz bhī apnī kahāñ thī muddatoñ se

jo tum aa.e to ham yak-laḳht mahfil ho ga.e haiñ

ye kis wahshat-zada lamhe mein daKHil ho gae hain

hum apne aap ke madd-e-muqabil ho gae hain

kai chehre meri sochon se zail ho gae hain

kai lahje mere lahje mein shamil ho gae hain

KHuda ke nam se tufan mein kashti utari

bhanwar jitne samundar mein the, sahil ho gae hain

wo kuchh pal jin ki ThanDi chhanw mein tum ho hamare

wahi kuchh pal to jiwan bhar ka hasil ho gae hain

ulajhte ja rahe hain justuju ke par musalsal

zamin-ta-asman kitne masail ho gae hain!

'nabil' aawaz bhi apni kahan thi muddaton se

jo tum aae to hum yak-laKHt mahfil ho gae hain