ye log hain kaise ki jinhen gham nahin hota

ye log haiñ kaise ki jinheñ ġham nahīñ hotā

mar jaa.e agar koī to mātam nahīñ hotā

har dard kī qismat meñ davā bhī nahīñ hotī

har zaḳhm kī taqdīr meñ marham nahīñ hotā

ho jaatā hai shādābī-e-ruḳhsār se mahrūm

vo phuul jo āsūda-e-shabnam nahīñ hotā

iz.hār-e-tamannā kī koī rut nahīñ hotī

iqrār-e-vafā kā koī mausam nahīñ hotā

har dar pe jo jhuk jaa.e use sar nahīñ kahte

sar vo hai ki jo vaar pe bhī ḳham nahīñ hotā

ye dard-e-mohabbat bhī ajab dard hai 'sābir'

baḌhtā hai to baḌhtā hai kabhī kam nahīñ hotā

ye log hain kaise ki jinhen gham nahin hota

mar jae agar koi to matam nahin hota

har dard ki qismat mein dawa bhi nahin hoti

har zaKHm ki taqdir mein marham nahin hota

ho jata hai shadabi-e-ruKHsar se mahrum

wo phul jo aasuda-e-shabnam nahin hota

izhaar-e-tamanna ki koi rut nahin hoti

iqrar-e-wafa ka koi mausam nahin hota

har dar pe jo jhuk jae use sar nahin kahte

sar wo hai ki jo war pe bhi KHam nahin hota

ye dard-e-mohabbat bhi ajab dard hai 'sabir'

baDhta hai to baDhta hai kabhi kam nahin hota