ye matlab hai ki muztar hi rahun main bazm-e-qatil mein

ye matlab hai ki muztar hī rahūñ maiñ bazm-e-qātil meñ

taḌaptā loTtā dāḳhil huā ādāb-e-mahfil meñ

asar kuchh aap ne dekhā hamāre jazb-e-kāmil kā

udhar chhūTe kamāñ se aur idhar tiir aa ga.e dil meñ

ilāhī kis se pūchheñ haal ham gor-e-ġharībāñ kā

ki saare ahl-e-mahfil chup haiñ us ḳhāmosh mahfil meñ

idhar aa kar zarā āñkhoñ meñ āñkheñ Dālne vaale

vo laTkā to batā de jis se dil ham Daal deñ dil meñ

badal de is tarah ai charḳh husn o ishq kā manzar

pas-e-mahmil ho lailā qais ho lailā ke mahmil meñ

bañdhe shart-e-vafā kyūñkar nibhe rasm-e-vafā kyūñkar

yahāñ kuchh aur hai dil meñ vahāñ kuchh aur hai dil meñ

hamāre dil kī duniyā rah ga.ī zer-o-zabar ho kar

qayāmat Dhā gayā zaanū badalnā un kā mahfil meñ

ye kyā andher hai kaisā ġhazab hai kyā tamāshā hai

miTāo bhī usī dil ko raho bhī tum usī dil meñ

tamāshā ham bhī dekheñ Duub kar bahr-e-mohabbat kā

apāhij kī tarah baiThe haiñ kyā āġhosh-e-sāhil meñ

tarīqa is se āsāñ aur kyā hai ghar banāne kā

mire āġhosh meñ aa kar jagah kar lījiye dil meñ

baḌhā ai 'nūh' jab tūfān dariyā-e-havādis kā

to ġhote vart-e-ġham ne de diye afkār-e-sāhil meñ

ye matlab hai ki muztar hi rahun main bazm-e-qatil mein

taDapta loTta daKHil hua aadab-e-mahfil mein

asar kuchh aap ne dekha hamare jazb-e-kaamil ka

udhar chhuTe kaman se aur idhar tir aa gae dil mein

ilahi kis se puchhen haal hum gor-e-ghariban ka

ki sare ahl-e-mahfil chup hain us KHamosh mahfil mein

idhar aa kar zara aankhon mein aankhen Dalne wale

wo laTka to bata de jis se dil hum Dal den dil mein

badal de is tarah ai charKH husn o ishq ka manzar

pas-e-mahmil ho laila qais ho laila ke mahmil mein

bandhe shart-e-wafa kyunkar nibhe rasm-e-wafa kyunkar

yahan kuchh aur hai dil mein wahan kuchh aur hai dil mein

hamare dil ki duniya rah gai zer-o-zabar ho kar

qayamat Dha gaya zanu badalna un ka mahfil mein

ye kya andher hai kaisa ghazab hai kya tamasha hai

miTao bhi usi dil ko raho bhi tum usi dil mein

tamasha hum bhi dekhen Dub kar bahr-e-mohabbat ka

apahij ki tarah baiThe hain kya aaghosh-e-sahil mein

tariqa is se aasan aur kya hai ghar banane ka

mere aaghosh mein aa kar jagah kar lijiye dil mein

baDha ai 'nuh' jab tufan dariya-e-hawadis ka

to ghote wart-e-gham ne de diye afkar-e-sahil mein