یہ میرا شیشۂ دل بے مثال ہے پیارے
یہ میرا شیشۂ دل بے مثال ہے پیارے
دکھائی دے ہے کہاں جتنا بال ہے پیارے
ہر ایک بات کو لکھنا محال ہے پیارے
خود آ کے دیکھ لو جو دل کا حال ہے پیارے
جہاں سے چاہا ہمیں لخت لخت کر ڈالا
بنا چھری کے یہ کیسا کمال ہے پیارے
مٹا دو حسن گلستاں کو شوخ پھولوں کو
ہو لب کشا کوئی کس کی مجال ہے پیارے
جھلس کے رہ گئے گلشن میں آشیاں کتنے
تری بہار میں کتنا جلال ہے پیارے
کسی کا خون عدالت میں پھر ہوا ہوگا
ستون دار و رسن لال لال ہے پیارے
کہاں کسی کی بھی صورت دکھائی دیتی ہے
ہر آئنے میں تو تیرا جمال ہے پیارے
ہر ایک سانس ہے انفاس باز پس کی طرح
نظام دم میں دما دم وبال ہے پیارے
وہ آ کے لوٹ گئے میری ڈیوڑھی سے سحرؔ
سکون دل کے لئے نیک فال ہے پیارے
مأخذ:
رقص سحر (Pg. 107)
- مصنف: بدیع الزماں سحر
-
- ناشر: بہار اردو اکیڈمی، پٹنہ
- سن اشاعت: 2008
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
