ye mere chaaron taraf kis liye ujala hai

ye mere chāroñ taraf kis liye ujālā hai

tirā ḳhayāl hai yā din nikalne vaalā hai

yaqīn maano maiñ kab kā bikhar gayā hotā

tumhārī yaad ne ab tak mujhe sambhālā hai

hujūm-e-jashn meñ kartā hai ġham-zadoñ ko talāsh

mujhe junūñ ne ajab imtihāñ meñ Daalā hai

kisī kā naam to ham le ke shab meñ sote haiñ

koī to hai jo sahar-dam jagāne vaalā hai

zamāna-sāz Dareñ gardish-e-zamāna se

hamārā kyā hai hameñ hādsoñ ne paalā hai

yahī bahut hai ki naqsh-e-qadam se bach jaa.eñ

suḳhan meñ rāsta kis ne nayā nikālā hai

ḳhudā kare ki use ilm bhī na ho 'mohsin'

vo jis ke gird mirī chāhatoñ kā haalā hai

ye mere chaaron taraf kis liye ujala hai

tera KHayal hai ya din nikalne wala hai

yaqin mano main kab ka bikhar gaya hota

tumhaari yaad ne ab tak mujhe sambhaala hai

hujum-e-jashn mein karta hai gham-zadon ko talash

mujhe junun ne ajab imtihan mein Dala hai

kisi ka nam to hum le ke shab mein sote hain

koi to hai jo sahar-dam jagane wala hai

zamana-saz Daren gardish-e-zamana se

hamara kya hai hamein hadson ne pala hai

yahi bahut hai ki naqsh-e-qadam se bach jaen

suKHan mein rasta kis ne naya nikala hai

KHuda kare ki use ilm bhi na ho 'mohsin'

wo jis ke gird meri chahaton ka haala hai