ye naqsh aisa nahin hai jise miTaun main

ye naqsh aisā nahīñ hai jise miTā.ūñ maiñ

mujhe batā ki tujhe kaise bhuul jā.ūñ maiñ

koī lakīr hī raushan nahīñ hathelī par

najūmiyoñ ko bhalā haath kyā dikhā.ūñ maiñ

bujhā bujhā sā nazar aa rahā hai har koī

fasāna-e-ġham-e-hastī kise sunā.ūñ maiñ

yaqīñ karo ki mirī jiit phir yaqīnī hai

magar kaho to ye baazī bhī haar jā.ūñ maiñ

nazar ke sāmne manzil ke rāste haiñ bahut

ye sochtā huuñ qadam kis taraf baḌhā.ūñ maiñ

ye baat sach hai ki buniyād huuñ imārat kī

ye aur baat kisī ko nazar na aa.uuñ maiñ

ġham-e-zamāna se fursat kahāñ 'asar-sāhab'

duā ko haath jo apne liye uThā.ūñ maiñ

ye naqsh aisa nahin hai jise miTaun main

mujhe bata ki tujhe kaise bhul jaun main

koi lakir hi raushan nahin hatheli par

najumiyon ko bhala hath kya dikhaun main

bujha bujha sa nazar aa raha hai har koi

fasana-e-gham-e-hasti kise sunaun main

yaqin karo ki meri jit phir yaqini hai

magar kaho to ye bazi bhi haar jaun main

nazar ke samne manzil ke raste hain bahut

ye sochta hun qadam kis taraf baDhaun main

ye baat sach hai ki buniyaad hun imarat ki

ye aur baat kisi ko nazar na aaun main

gham-e-zamana se fursat kahan 'asar-sahab'

dua ko hath jo apne liye uThaun main