ye rang-o-nur bhala kab kisi ke hath aae

ye rañg-o-nūr bhalā kab kisī ke haath aa.e

kidhar chale haiñ añdhere ye haath phailā.e

ḳhudā kare koī sham.eñ liye chalā aa.e

dhaḌak rahe haiñ mire dil meñ shaam ke saa.e

kahāñ vo aur kahāñ merī pur-ḳhatar rāheñ

magar vo phir bhī mire saath duur tak aa.e

maiñ apne ahd meñ sham-e-mazār ho ke rahā

kabhī na dekh sake mujh ko mere ham-sā.e

chale-chalo ki batā degī raah ḳhud raste

kahāñ hai vaqt ki koī kisī ko samjhā.e

haram kī aabrū ham ne bahut rakhī phir bhī

ka.ī charāġh sanam-ḳhāne meñ jalā aa.e

maiñ apne dil ko to taskīn de bhī luuñ 'maikash'

vo muztarib hai bahut kaun us ko samjhā.e

ye rang-o-nur bhala kab kisi ke hath aae

kidhar chale hain andhere ye hath phailae

KHuda kare koi shamen liye chala aae

dhaDak rahe hain mere dil mein sham ke sae

kahan wo aur kahan meri pur-KHatar rahen

magar wo phir bhi mere sath dur tak aae

main apne ahd mein sham-e-mazar ho ke raha

kabhi na dekh sake mujh ko mere ham-sae

chale-chalo ki bata degi rah KHud raste

kahan hai waqt ki koi kisi ko samjhae

haram ki aabru hum ne bahut rakhi phir bhi

kai charagh sanam-KHane mein jala aae

main apne dil ko to taskin de bhi lun 'maikash'

wo muztarib hai bahut kaun us ko samjhae