ye sab qubul jalao hamein bujhao hamein

ye sab qubūl jalāo hameñ bujhāo hameñ

kahīñ to le chalo sankī huī havāo hameñ

zamīñ ke qad se bhī chhoTā ye āsmāñ niklā

ab āsmāñ se zamīñ par utaar laao hameñ

alag hai apnī adā phuul bhī haiñ ḳhanjar bhī

vo āstīñ ho ki dāman kahīñ chhupāo hameñ

is aa.ine meñ chalo jā.eza hī leñ apnā

hamāre daur kā chehra zarā dikhāo hameñ

qadam qadam vahī be-nām manziloñ kā safar

ḳhabar nahīñ ki hai karnā kahāñ paḌāv hameñ

abhī to saaz ke tāroñ ko kas rahā hai shu.ūr

abhī na qarya-e-āvāz meñ bulāo hameñ

nahīñ gulāb ki raunaq baneñge āñgan kī

chamaktī dhuup meñ dīvār par bichhāo hameñ

chalo ki shart-e-rifāqat bhī saath chhoḌ ga.ī

kabhī jo yaad bhī aa.eñ to bhuul jaao hameñ

abhī to jū-e-tunuk-āb se hī ham bhī 'fazā'

kahāñ milā tire āhang kā bahāo hameñ

ye sab qubul jalao hamein bujhao hamein

kahin to le chalo sanki hui hawao hamein

zamin ke qad se bhi chhoTa ye aasman nikla

ab aasman se zamin par utar lao hamein

alag hai apni ada phul bhi hain KHanjar bhi

wo aastin ho ki daman kahin chhupao hamein

is aaine mein chalo jaeza hi len apna

hamare daur ka chehra zara dikhao hamein

qadam qadam wahi be-nam manzilon ka safar

KHabar nahin ki hai karna kahan paDaw hamein

abhi to saz ke taron ko kas raha hai shuur

abhi na qarya-e-awaz mein bulao hamein

nahin gulab ki raunaq banenge aangan ki

chamakti dhup mein diwar par bichhao hamein

chalo ki shart-e-rifaqat bhi sath chhoD gai

kabhi jo yaad bhi aaen to bhul jao hamein

abhi to ju-e-tunuk-ab se hi hum bhi 'faza'

kahan mila tere aahang ka bahao hamein