ye sach hai un mein ye baaten to han hain

ye sach hai un meñ ye bāteñ to haañ haiñ

baḌe bad-zan nihāyat bad-gumāñ haiñ

ġhalat hai ye vo ham par mehrbāñ haiñ

kahāñ apnī samajh hai ham kahāñ haiñ

na ye pūchheñ na aa.e hijr meñ maut

ḳhudā bhūlā hai but nā-mehrbāñ haiñ

nahīñ uThte haiñ aa kar ġhair hargiz

mohabbat meñ yahī bār-e-garāñ haiñ

subūt-e-ishq hai lab ḳhushk sard aah

chhupā.eñ kyā ki ye sab to ayaañ haiñ

na pūchho be-ḳhudī-e-ishq ham se

ḳhabar bhī kuchh nahīñ hai ham kahāñ haiñ

vo kuchh samjheñ sunā deñ hāl-e-dil to

yahī nā vo nihāyat bad-gumāñ haiñ

jab aayā nāvak-e-qātil sū-e-dil

jigar hī bol uTThā ham yahāñ haiñ

abhī uktā ga.e tum hazrat-e-dil

mohabbat meñ hazāroñ imtihāñ haiñ

hameñ bahlā ke rahte haiñ ġham-o-rañj

yahī furqat meñ goyā mehrbāñ haiñ

na kyoñ rashk aa.e baḳht-e-mudda.ī par

ki vo us par bahut hī mehrbāñ haiñ

kareñ kis tarah chāhat un kī ham kam

abhī nām-e-ḳhudā vo naujavāñ haiñ

kabhī kar dī thī zāhir ḳhvāhish-e-vasl

jabhī se to bahut vo bad-gumāñ haiñ

hasīnoñ meñ nahīñ koī burā.ī

magar ik aib ye hai bad-zabāñ haiñ

na kyoñ lutf aa.e ab un ke sitam meñ

sunā hai vo sharīk-e-āsmāñ haiñ

kahe dete haiñ ab dil ko sambhālo

ki ham āmāda-e-āh-o-fuġhāñ haiñ

samajhte haiñ hameñ aur ġhair ko ek

hamāre aap achchhe qadr-dāñ haiñ

zarā Thahro jo aa.e ho dam-e-naz.a

ki ab ham koī dam ke mehmāñ haiñ

'fahīm' itnā hī kyā kam hai hameñ faḳhr

suno ahl-e-zabāñ shīrīñ-zabāñ haiñ

ye sach hai un mein ye baaten to han hain

baDe bad-zan nihayat bad-guman hain

ghalat hai ye wo hum par mehrban hain

kahan apni samajh hai hum kahan hain

na ye puchhen na aae hijr mein maut

KHuda bhula hai but na-mehrban hain

nahin uThte hain aa kar ghair hargiz

mohabbat mein yahi bar-e-garan hain

subut-e-ishq hai lab KHushk sard aah

chhupaen kya ki ye sab to ayan hain

na puchho be-KHudi-e-ishq hum se

KHabar bhi kuchh nahin hai hum kahan hain

wo kuchh samjhen suna den haal-e-dil to

yahi na wo nihayat bad-guman hain

jab aaya nawak-e-qatil su-e-dil

jigar hi bol uTTha hum yahan hain

abhi ukta gae tum hazrat-e-dil

mohabbat mein hazaron imtihan hain

hamein bahla ke rahte hain gham-o-ranj

yahi furqat mein goya mehrban hain

na kyon rashk aae baKHt-e-muddai par

ki wo us par bahut hi mehrban hain

karen kis tarah chahat un ki hum kam

abhi nam-e-KHuda wo naujawan hain

kabhi kar di thi zahir KHwahish-e-wasl

jabhi se to bahut wo bad-guman hain

hasinon mein nahin koi burai

magar ek aib ye hai bad-zaban hain

na kyon lutf aae ab un ke sitam mein

suna hai wo sharik-e-asman hain

kahe dete hain ab dil ko sambhaalo

ki hum aamada-e-ah-o-fughan hain

samajhte hain hamein aur ghair ko ek

hamare aap achchhe qadr-dan hain

zara Thahro jo aae ho dam-e-naza

ki ab hum koi dam ke mehman hain

'fahim' itna hi kya kam hai hamein faKHr

suno ahl-e-zaban shirin-zaban hain