یہ تیری سرد مہری یہ تیری کج ادائی

یہ تیری سرد مہری یہ تیری کج ادائی

اک حسن دل فریبی اک شان دل ربائی

عالم سے تیرا چھپنا ہے عالم آشنائی

پنہاں حجاب میں ہے انداز خود نمائی

اے عشق فتنہ ساماں تیری سمجھ کہاں ہے

معصوم حسن کے سر الزام بے وفائی

اس در کا کوئی سجدہ مقبول ہو عجب کیا

کچھ ہم بھی آج کر لیں تقدیر آزمائی

دھارے پہ بحر غم کے بے خوف جا رہے ہیں

کشتی نہیں ہماری محتاج نا خدائی

اے خاک راہ منزل اب تجھ پہ بار ہیں ہم

ہم کو بٹھا چکا ہے رنج شکستہ پائی

اٹھوا رہا ہے مجھ کو ندرتؔ کسی کے در سے

یہ ذوق سجدہ ریزی یہ شوق جبہہ سائی