yun akela dasht-e-ghurbat mein dil-e-nakaam tha

yuuñ akelā dasht-e-ġhurbat meñ dil-e-nākām thā

pīchhe pīchhe maut thī aage ḳhudā kā naam thā

bante hī ghar ibtidā meñ rū-kash-e-anjām thā

tinke chun kar jab nazar kī āshiyāñ ik daam thā

be-mahal dil ke bujhāne se unheñ kyā mil gayā

jis ko sham-e-sub.h samjhe vo charāġh-e-shām thā

hāl-e-mun.im ḳhud-ġharaz kyā jāneñ mai-ḳhāna meñ kal

riñd the be-fikr gardish meñ dimāġh-e-jām thā

bas yahī fiqra ki shām-e-hijr ne maarā mujhe

koī kah aatā to kitnā muḳhtasar paiġhām thā

saikḌoñ baar ek āh-e-sard se tharrā chukā

kis qadar nazdīk dil se āsmāñ kā baam thā

nāmvar phir kaun hogā kār-zār-e-dahr meñ

jab yahāñ dil sā alam-bardār-e-ġham gumnām thā

monis-e-vahdat ko kho baiThā baḌī mushkil ye hai

kāTnā ik shām-e-furqat kā zarā sā kaam thā

sau jagah se chhin rahā thā jab tū Dartā kis liye

khā gayā dhokā ki mere dil kī sūrat daam thā

sar chaḌhāyā maiñ ne chun chun kar ḳhas-o-ḳhāshāk ko

baaġh ke tinke the vo jin kā nasheman naam thā

zab.h meñ ik bhiiḌ sī dekhī thī lekin kyā ḳhabar

gard merī hasrateñ thiiñ yā hujūm-e-ām thā

mere naale the shab-e-furqat meñ kitne bar-mahal

un ke kānoñ meñ magar ik shor-e-be-hañgām thā

kyā zamāne kā gilā 'sāqib' kisī kā kyā qusūr

ye dil-e-ġham-dost ḳhud hī dushman-e-ārām thā

yun akela dasht-e-ghurbat mein dil-e-nakaam tha

pichhe pichhe maut thi aage KHuda ka nam tha

bante hi ghar ibtida mein ru-kash-e-anjam tha

tinke chun kar jab nazar ki aashiyan ek dam tha

be-mahal dil ke bujhane se unhen kya mil gaya

jis ko sham-e-subh samjhe wo charagh-e-sham tha

haal-e-munim KHud-gharaz kya jaanen mai-KHana mein kal

rind the be-fikr gardish mein dimagh-e-jam tha

bas yahi fiqra ki sham-e-hijr ne mara mujhe

koi kah aata to kitna muKHtasar paigham tha

saikDon bar ek aah-e-sard se tharra chuka

kis qadar nazdik dil se aasman ka baam tha

namwar phir kaun hoga kar-zar-e-dahr mein

jab yahan dil sa alam-bardar-e-gham gumnam tha

monis-e-wahdat ko kho baiTha baDi mushkil ye hai

kaTna ek sham-e-furqat ka zara sa kaam tha

sau jagah se chhin raha tha jab tu Darta kis liye

kha gaya dhoka ki mere dil ki surat dam tha

sar chaDhaya main ne chun chun kar KHas-o-KHashak ko

bagh ke tinke the wo jin ka nasheman nam tha

zabh mein ek bhiD si dekhi thi lekin kya KHabar

gard meri hasraten thin ya hujum-e-am tha

mere nale the shab-e-furqat mein kitne bar-mahal

un ke kanon mein magar ek shor-e-be-hangam tha

kya zamane ka gila 'saqib' kisi ka kya qusur

ye dil-e-gham-dost KHud hi dushman-e-aram tha