ذاتی معاملات سے باہر کا کچھ کہو

ذاتی معاملات سے باہر کا کچھ کہو

تم کاتب حیات سے باہر کا کچھ کہو

بیزار ہو گئی ہوں پرانے خطاب سے

اس بار کائنات سے باہر کا کچھ کہو

تفتیش ہو رہی ہے مرے فن پہ ان دنوں

تم لوگ میری ذات سے باہر کا کچھ کہو

رہنے دو اپنی پہلی محبت کا تذکرہ

یعنی کہ پل صراط سے باہر کا کچھ کہو

خوش فہمیوں کی جال سے نکلو ذرا سی دیر

اب حسن شاعرات سے باہر کا کچھ کہو

دور جدیدیت میں پرانا یہ فلسفہ

ایسا ہے تو لغات سے باہر کا کچھ کہو

تم بولنے کے فن میں تو ماہر ہو شازیہؔ

لیکن ذرا صفات سے باہر کا کچھ کہو