zaban ko hukm hi kahan ki dastan-e-gham kahen

zabāñ ko hukm hī kahāñ ki dāstān-e-ġham kaheñ

adā adā se tum kaho nazar nazar se ham kaheñ

jo tum ḳhudā ḳhudā kaho to ham sanam sanam kaheñ

ki ek hī sī baat hai vo tum kaho ki ham kaheñ

mile haiñ tishna mai-kashoñ ko chand jaam is liye

kaheñ na hāl-e-tishnagī kaheñ to kam se kam kaheñ

sitamgarān-e-sāda-dil ye baat jānte nahīñ

ki vo sitam-zarīf haiñ sitam ko jo karam kaheñ

subū ho mere haath meñ to kāsa-e-gadāgarī

jo tum uThā lo jaam to log jām-e-jam kaheñ

'shamīm' vo na saath deñ to mujh se tai na ho sakeñ

ye zindagī ke rāste ki zulf-e-ḳham-ba-ḳham kaheñ

zaban ko hukm hi kahan ki dastan-e-gham kahen

ada ada se tum kaho nazar nazar se hum kahen

jo tum KHuda KHuda kaho to hum sanam sanam kahen

ki ek hi si baat hai wo tum kaho ki hum kahen

mile hain tishna mai-kashon ko chand jam is liye

kahen na haal-e-tishnagi kahen to kam se kam kahen

sitamgaran-e-sada-dil ye baat jaante nahin

ki wo sitam-zarif hain sitam ko jo karam kahen

subu ho mere hath mein to kasa-e-gadagari

jo tum uTha lo jam to log jam-e-jam kahen

'shamim' wo na sath den to mujh se tai na ho saken

ye zindagi ke raste ki zulf-e-KHam-ba-KHam kahen