zaban kya hai mohabbat ki guftugu kya hai

zabān kyā hai mohabbat kī guftugū kyā hai

ba-juz nigāh ke paiġhām-e-ārzū kyā hai

ye jān-e-husn-e-mohabbat hai aarzū kyā hai

na ho ye dil meñ to maiñ kyā huuñ aur tū kyā hai

lahū jo garm na kar de vo aarzū kyā hai

jo aarzū se na garmā.e vo lahū kyā hai

ḳhudā kare na kare husn se tajāvuz-e-ishq

abhī to mujh se vahī kah rahe haiñ tū kyā hai

tujhe bhī bhuul ga.e tere DhūñDne vaale

ye hosh bhī to nahīñ hai ki justujū kyā hai

bajā ki ḳhuun kī garmī kā naam hai insāñ

na ho jo garm-e-mohabbat se vo lahū kyā hai

ġhalat samajh ke nahīñ dekhtā huuñ terī taraf

ye dekhtā huuñ ki andāz-e-guftugū kyā hai

jinheñ hai tujh se mohabbat vo jānte bhī nahīñ

ki rashk kahte haiñ kis chiiz ko adū kyā hai

rahe ilāhī mire dil kī aabrū qaa.em

sadaf meñ hai ye guhar dil meñ aarzū kyā hai

hai un kī jumbish-e-abrū pe aabrū kā madār

jo jānte bhī nahīñ haiñ ki aabrū kyā hai

sivā.e zauq-e-nazar aur kuchh nahīñ 'bismil'

ye phuul kyā haiñ ye phūloñ meñ rañg-o-bū kyā hai

zaban kya hai mohabbat ki guftugu kya hai

ba-juz nigah ke paigham-e-arzu kya hai

ye jaan-e-husn-e-mohabbat hai aarzu kya hai

na ho ye dil mein to main kya hun aur tu kya hai

lahu jo garm na kar de wo aarzu kya hai

jo aarzu se na garmae wo lahu kya hai

KHuda kare na kare husn se tajawuz-e-ishq

abhi to mujh se wahi kah rahe hain tu kya hai

tujhe bhi bhul gae tere DhunDne wale

ye hosh bhi to nahin hai ki justuju kya hai

baja ki KHun ki garmi ka nam hai insan

na ho jo garm-e-mohabbat se wo lahu kya hai

ghalat samajh ke nahin dekhta hun teri taraf

ye dekhta hun ki andaz-e-guftugu kya hai

jinhen hai tujh se mohabbat wo jaante bhi nahin

ki rashk kahte hain kis chiz ko adu kya hai

rahe ilahi mere dil ki aabru qaem

sadaf mein hai ye guhar dil mein aarzu kya hai

hai un ki jumbish-e-abru pe aabru ka madar

jo jaante bhi nahin hain ki aabru kya hai

siwae zauq-e-nazar aur kuchh nahin 'bismil'

ye phul kya hain ye phulon mein rang-o-bu kya hai