zahr is mahaul ka mujh mein kuchh itna bhar gaya

zahr is māhaul kā mujh meñ kuchh itnā bhar gayā

saañp ne kaaTā mujhe aur kāTte hī mar gayā

maiñ zamāne kī sharāfat se kuchh aisā Dar gayā

mere andar kā farishta ḳhauf khā kar mar gayā

vo ghanerā peḌ jis ke saa.e meñ rahte the ham

āñdhiy.oñ meñ jab girā to ghar ko āñgan kar gayā

aa.ina TuuTā huā thā yā ḳharāsheñ thiiñ bahut

apnā chehra dekhte hī maiñ achānak Dar gayā

baat sachchī ho to bātil ḳhauf khātā hai zarūr

ek muusā ke liye fir'aun kā lashkar gayā

saañs lenā zindagī kī ik 'alāmat hai magar

ye bhī dekhā hai ki insāñ saañs le kar mar gayā

qalb kī tārīkiyāñ chehre pe raushan ho ga.iiñ

titliyoñ kā ruup aisā thā ki bhauñrā Dar gayā

jism bach kar aa gayā ye bhī ġhanīmat jāniye

varna maqtal meñ pahuñch kar kaun vāpas ghar gayā

qatl kā ilzām bhī jis par lagā sakte nahīñ

marne vaalā ek aisā naam le kar mar gayā

ek maiñ kotāh-qad thā us kī mahfil meñ 'mushīr'

is liye mere 'alāva har kisī kā sar gayā

zahr is mahaul ka mujh mein kuchh itna bhar gaya

sanp ne kaTa mujhe aur kaTte hi mar gaya

main zamane ki sharafat se kuchh aisa Dar gaya

mere andar ka farishta KHauf kha kar mar gaya

wo ghanera peD jis ke sae mein rahte the hum

aandhiyon mein jab gira to ghar ko aangan kar gaya

aaina TuTa hua tha ya KHarashen thin bahut

apna chehra dekhte hi main achanak Dar gaya

baat sachchi ho to baatil KHauf khata hai zarur

ek musa ke liye fir'aun ka lashkar gaya

sans lena zindagi ki ek 'alamat hai magar

ye bhi dekha hai ki insan sans le kar mar gaya

qalb ki tarikiyan chehre pe raushan ho gain

titliyon ka rup aisa tha ki bhaunra Dar gaya

jism bach kar aa gaya ye bhi ghanimat jaaniye

warna maqtal mein pahunch kar kaun wapas ghar gaya

qatl ka ilzam bhi jis par laga sakte nahin

marne wala ek aisa nam le kar mar gaya

ek main kotah-qad tha us ki mahfil mein 'mushir'

is liye mere 'alawa har kisi ka sar gaya