zaKHm jab guftugu nahin karta

zaḳhm jab guftugū nahīñ kartā

chārāgar bhī rafū nahīñ kartā

shahr-e-ulfat kā vo munāfiq hai

baat jo rū-ba-rū nahīñ kartā

bāt-be-bāt muskurātā huuñ

ġham ko maiñ surḳh-rū nahīñ kartā

huuk andar se uTh rahī hai miyāñ

maiñ dikhāne ko hū nahīñ kartā

zabt kī āḳhirī nishānī hai

maiñ agar hāo-hū nahīñ kartā

Thiik hai dekh-bhāl kartā hai

zaḳhm lekin rafū nahīñ kartā

apne tā.īñ vo ḳhuub likhtā hai

lafz kī aabrū nahīñ kartā

ai mire pārsā batā mujh ko

maiñ jo kartā huuñ tū nahīñ kartā

jo udāsī kā peḌ hai 'shāhid'

sabz-rut meñ numū nahīñ kartā

zaKHm jab guftugu nahin karta

chaaragar bhi rafu nahin karta

shahr-e-ulfat ka wo munafiq hai

baat jo ru-ba-ru nahin karta

baat-be-baat muskuraata hun

gham ko main surKH-ru nahin karta

huk andar se uTh rahi hai miyan

main dikhane ko hu nahin karta

zabt ki aaKHiri nishani hai

main agar hao-hu nahin karta

Thik hai dekh-bhaal karta hai

zaKHm lekin rafu nahin karta

apne tain wo KHub likhta hai

lafz ki aabru nahin karta

ai mere parsa bata mujh ko

main jo karta hun tu nahin karta

jo udasi ka peD hai 'shahid'

sabz-rut mein numu nahin karta