zaKHm par rakhta hai marham aasman nashtar samet

zaḳhm par rakhtā hai marham āsmāñ nashtar samet

amn kā paiġhām detī hai havā ḳhanjar samet

jab mire hamdard ne be-dast-o-pā dekhā mujhe

le gayā mere samundar se sadaf gauhar samet

chār-jānib aag bhaḌkā.ī ga.ī is taur se

ahl-e-bīnash kī nazar bhī jal ga.ī manzar samet

āsmāñ kī chhat zamīñ kā farsh baḳhshtā jā.egā

ghar ujāḌe jā.eñge buniyād ke patthar samet

tez raftārī ne duniyā kī uḌāyā ye ġhubār

har samāñ dhuñdlā gayā us ā.ina-paikar samet

jal rahe haiñ jo lahū se un diyoñ ke sāmne

haar baiThe haiñ parastrān-e-sarsar sarsar samet

dekhnā ye āñsuoñ kī chand būñdoñ kā kamāl

lahlhā uThī hai pathrīlī zamīñ banjar samet

maiñ ne terā naam le kar jab rakhā takiye pe sar

saarā kamra ḳhushbuoñ se bhar gayā bistar samet

murġh-e-kam-himmat fazā-e-be-karāñ hote hue

āshiyāne tak rahā mahdūd bāl-o-par samet

kal zamīñ mere muqābil vazn meñ halkī paḌī

mujh ko jab rakkhā gayā palre meñ chashm-e-tar samet

is tahī dastī meñ 'māhir' aabrū kā kyā savāl

ham gañvā baiThe haiñ dastār-e-fazīlat sar samet

zaKHm par rakhta hai marham aasman nashtar samet

amn ka paigham deti hai hawa KHanjar samet

jab mere hamdard ne be-dast-o-pa dekha mujhe

le gaya mere samundar se sadaf gauhar samet

chaar-jaanib aag bhaDkai gai is taur se

ahl-e-binash ki nazar bhi jal gai manzar samet

aasman ki chhat zamin ka farsh baKHshta jaega

ghar ujaDe jaenge buniyaad ke patthar samet

tez raftari ne duniya ki uDaya ye ghubar

har saman dhundla gaya us aaina-paikar samet

jal rahe hain jo lahu se un diyon ke samne

haar baiThe hain parastran-e-sarsar sarsar samet

dekhna ye aansuon ki chand bundon ka kamal

lahlha uThi hai pathrili zamin banjar samet

main ne tera nam le kar jab rakha takiye pe sar

sara kamra KHushbuon se bhar gaya bistar samet

murgh-e-kam-himmat faza-e-be-karan hote hue

aashiyane tak raha mahdud baal-o-par samet

kal zamin mere muqabil wazn mein halki paDi

mujh ko jab rakkha gaya palre mein chashm-e-tar samet

is tahi dasti mein 'mahir' aabru ka kya sawal

hum ganwa baiThe hain dastar-e-fazilat sar samet