zaKHmon se kahan lafzon se mari gai hun main

zaḳhmoñ se kahāñ lafzoñ se maarī ga.ī huuñ maiñ

jīvan ke chaak se yuuñ utārī ga.ī huuñ maiñ

mujh ko mire vajūd meñ bas tū hī tū milā

aise tirī mahak se sañvārī ga.ī huuñ maiñ

afsos mujh ko us ne utārā hai gor meñ

jis ke liye falak se utārī ga.ī huuñ maiñ

mujh ko kiyā hai ḳhaak to phir ḳhaak bhī uḌā

ai ishq terī raah meñ vaarī ga.ī huuñ maiñ

lo aa ga.ī huuñ hijr meñ marne ke vāste

itne ḳhulūs se jo pukārī ga.ī huuñ maiñ

merī sadāqatoñ pe tumheñ kyuuñ nahīñ yaqīn

sau baar aag se bhī guzārī ga.ī huuñ maiñ

tum jānte nahīñ ho aziyyat ke kaif ko

hijrat ke karb se to guzārī ga.ī huuñ maiñ

maiñ miT chukī huuñ aur numāyāñ huā hai tū

murshid ḳhumār meñ yuuñ ḳhumārī ga.ī huuñ maiñ

is vajd meñ vajūd kahāñ hai mirā vajūd

jaane kahāñ pe saarī kī saarī ga.ī huuñ maiñ

maqtal meñ jaan denā thī pyāroñ ke vāste

maiñ hī thī un ko jaan se pyārī ga.ī huuñ maiñ

ye qarz-e-ishq maiñ ne chukānā thā is liye

'shāhīn' apnī jaan se vaarī ga.ī huuñ maiñ

zaKHmon se kahan lafzon se mari gai hun main

jiwan ke chaak se yun utari gai hun main

mujh ko mere wajud mein bas tu hi tu mila

aise teri mahak se sanwari gai hun main

afsos mujh ko us ne utara hai gor mein

jis ke liye falak se utari gai hun main

mujh ko kiya hai KHak to phir KHak bhi uDa

ai ishq teri rah mein wari gai hun main

lo aa gai hun hijr mein marne ke waste

itne KHulus se jo pukari gai hun main

meri sadaqaton pe tumhein kyun nahin yaqin

sau bar aag se bhi guzari gai hun main

tum jaante nahin ho aziyyat ke kaif ko

hijrat ke karb se to guzari gai hun main

main miT chuki hun aur numayan hua hai tu

murshid KHumar mein yun KHumari gai hun main

is wajd mein wajud kahan hai mera wajud

jaane kahan pe sari ki sari gai hun main

maqtal mein jaan dena thi pyaron ke waste

main hi thi un ko jaan se pyari gai hun main

ye qarz-e-ishq main ne chukana tha is liye

'shahin' apni jaan se wari gai hun main