zamin badli falak badla mazaq-e-zindagi badla

zamīñ badlī falak badlā mazāq-e-zindagī badlā

tamaddun ke qadīm aqdār badle aadmī badlā

ḳhudā-o-ahrman badle vo īmān-e-duī badlā

hudūd-e-ḳhair-o-shar badle mazāq-e-kāfirī badlā

na.e insān kā jab daur-e-ḳhud-nā-āgahī badlā

rumūz-e-be-ḳhudī badle taqāzā-e-ḳhudī badlā

badalte jā rahe haiñ ham bhī duniyā ko badalne meñ

nahīñ badlī abhī duniyā to duniyā ko abhī badlā

na.ī manzil ke mīr-e-kārvāñ bhī aur hote haiñ

purāne ḳhizr-e-rah badle vo tarz-e-rahbarī badlā

kabhī sochā bhī hai ai nazm-e-kohna ke ḳhudā-vando

tumhārā hashr kyā hogā jo ye aalam kabhī badlā

udhar pichhle se ahl-e-māl-o-zar par raat bhārī hai

idhar bedārī-e-jamhūr kā andāz bhī badlā

zahe soz-e-ġham-e-ādam ḳhushā sāz-e-dil-e-ādam

isī ik sham.a kī lau ne jahān-e-tīrgī badlā

na.e mansūr haiñ sadiyoñ purāne sheḳh-o-qāzī haiñ

na fatve kufr ke badle na uzr-e-dār hī badlā

batā.e to batā.e us ko terī shoḳhī-e-pinhāñ

tirī chashm-e-tavajjoh hai ki tarz-e-be-ruḳhī badlā

ba-faiz-e-ādam-e-ḳhākī zamīñ sonā ugaltī hai

usī zarre ne daur-e-mehr-o-māh-o-mushtarī badlā

sitāre jāgte haiñ raat laT chhaTkā.e sotī hai

dabe paañv kisī ne aa ke ḳhvāb-e-zindagī badlā

'firāq'-e-ham-navā-e-'mīr'-o-'ġhālib' ab na.e naġhme

vo bazm-e-zindagī badlī vo rañg-e-shā.irī badlā

zamin badli falak badla mazaq-e-zindagi badla

tamaddun ke qadim aqdar badle aadmi badla

KHuda-o-ahrman badle wo iman-e-dui badla

hudud-e-KHair-o-shar badle mazaq-e-kafiri badla

nae insan ka jab daur-e-KHud-na-agahi badla

rumuz-e-be-KHudi badle taqaza-e-KHudi badla

badalte ja rahe hain hum bhi duniya ko badalne mein

nahin badli abhi duniya to duniya ko abhi badla

nai manzil ke mir-e-karwan bhi aur hote hain

purane KHizr-e-rah badle wo tarz-e-rahbari badla

kabhi socha bhi hai ai nazm-e-kohna ke KHuda-wando

tumhaara hashr kya hoga jo ye aalam kabhi badla

udhar pichhle se ahl-e-mal-o-zar par raat bhaari hai

idhar bedari-e-jamhur ka andaz bhi badla

zahe soz-e-gham-e-adam KHusha saz-e-dil-e-adam

isi ek shama ki lau ne jahan-e-tirgi badla

nae mansur hain sadiyon purane sheKH-o-qazi hain

na fatwe kufr ke badle na uzr-e-dar hi badla

batae to batae us ko teri shoKHi-e-pinhan

teri chashm-e-tawajjoh hai ki tarz-e-be-ruKHi badla

ba-faiz-e-adam-e-KHaki zamin sona ugalti hai

usi zarre ne daur-e-mehr-o-mah-o-mushtari badla

sitare jagte hain raat laT chhaTkae soti hai

dabe panw kisi ne aa ke KHwab-e-zindagi badla

'firaq'-e-ham-nawa-e-'mir'-o-'ghaalib' ab nae naghme

wo bazm-e-zindagi badli wo rang-e-shairi badla