zamin ke hath mein hun aur na aasman ke hi

zamīñ ke haath meñ huuñ aur na āsmān ke hī

paḌā huā huuñ maiñ aisī jagah pe jaan ke hī

na ham se kahte haiñ kuchh aur na ham se sunte haiñ

ye aadmī haiñ kisī dūsre jahān ke hī

tire jahān ke jhagḌoñ meñ haath kyuuñ Dāloñ

mujhe bahut haiñ bakheḌe mire makān ke hī

sunā rahī hai jise joḌ joḌ kar duniyā

tamām TukḌe haiñ vo merī dāstān ke hī

tire falak pe hai kyā aur bhī koī raushan

chamak rahe haiñ sitāre to ḳhāk-dān ke hī

hameñ jo maan rahe haiñ zabāñ se bhī apnī

is intihā pe vo aa.e haiñ dil se maan ke hī

kisī se koī nahīñ bāz-purs duniyā meñ

zamāna pīchhe paḌā hai hamārī jaan ke hī

to kyā tujhe bhī koī aur kaam baaqī nahīñ

jo ham pe rahne lage din ye imtihān ke hī

magar ye qatl kī sāzish kahāñ se aa niklī

vo ḳhat vo log to the mere ḳhāndān ke hī

so band karnā paḌā mujh ko kārobār-e-hayāt

vo aa ke baiTh gayā sāmne dukān ke hī

zamin ke hath mein hun aur na aasman ke hi

paDa hua hun main aisi jagah pe jaan ke hi

na hum se kahte hain kuchh aur na hum se sunte hain

ye aadmi hain kisi dusre jahan ke hi

tere jahan ke jhagDon mein hath kyun Dalon

mujhe bahut hain bakheDe mere makan ke hi

suna rahi hai jise joD joD kar duniya

tamam TukDe hain wo meri dastan ke hi

tere falak pe hai kya aur bhi koi raushan

chamak rahe hain sitare to KHak-dan ke hi

hamein jo man rahe hain zaban se bhi apni

is intiha pe wo aae hain dil se man ke hi

kisi se koi nahin baz-purs duniya mein

zamana pichhe paDa hai hamari jaan ke hi

to kya tujhe bhi koi aur kaam baqi nahin

jo hum pe rahne lage din ye imtihan ke hi

magar ye qatl ki sazish kahan se aa nikli

wo KHat wo log to the mere KHandan ke hi

so band karna paDa mujh ko karobar-e-hayat

wo aa ke baiTh gaya samne dukan ke hi