zamin ke zaKHm ko pahle rafu kiya jae

zamīñ ke zaḳhm ko pahle rafū kiyā jaa.e

phir us ke ba.ad darīda falak siyā jaa.e

hamārā aks agar darmiyāñ na haa.il ho

to aa.ine ko gale se lagā liyā jaa.e

ye zindagī to purānī sharāb jaisī hai

ye kaḌvā ghūñT hai lekin ise piyā jaa.e

jo raftagāñ haiñ unheñ lauT kar nahīñ aanā

ab intizār kā bistar uThā diyā jaa.e

tumhārī yaad ne shab-ḳhūn mārnā hai to kyā

dil-o-dimāġh se pahra haTā diyā jaa.e

hamāre sar pe jo TuuTā hai āsmāñ to kyā

ab āsmān ko sar par uThā liyā jaa.e

zamin ke zaKHm ko pahle rafu kiya jae

phir us ke baad darida falak siya jae

hamara aks agar darmiyan na hail ho

to aaine ko gale se laga liya jae

ye zindagi to purani sharab jaisi hai

ye kaDwa ghunT hai lekin ise piya jae

jo raftagan hain unhen lauT kar nahin aana

ab intizar ka bistar uTha diya jae

tumhaari yaad ne shab-KHun marna hai to kya

dil-o-dimagh se pahra haTa diya jae

hamare sar pe jo TuTa hai aasman to kya

ab aasman ko sar par uTha liya jae