zamin par ek mukammal juzw laya ja chuka tha

zamīñ par ik mukammal juzv laayā jā chukā thā

mujhe mujh se bahut pahle banāyā jā chukā thā

mirī fard-e-'amal tāḳhīr se mujh ko milī thī

maiñ jab pahuñchā vahāñ mahshar uThāyā jā chukā thā

mirī āñkhoñ meñ ehsās-e-nazar bharne se pahle

mirā manzar mire andar banāyā jā chukā thā

samā'at jism ko sauñpī ga.ī par is se pahle

hamārī ruuh ko naġhma sunāyā jā chukā thā

hamāre ism the mā'rūf har mahfil meñ ham ko

pahuñchne se bahut pahle bulāyā jā chukā thā

kisī sūrat na thā mumkin ki ham baazī palaTte

ġhalat jānib ġhalat mohrā baḌhāyā jā chukā thā

safar meñ ik maqām aisā bhī aayā thā ki jis par

badan sākit khaḌā thā aur saaya jā chukā thā

na thā mumkin vahāñ hālāt ko tabdīl karnā

jahāñ tārīḳh ko yaksar bhulāyā jā chukā thā

mu'āfī kā huā thā qasr-e-shah se hukm jaarī

magar us vaqt 'āsim' zahr khāyā jā chukā thā

zamin par ek mukammal juzw laya ja chuka tha

mujhe mujh se bahut pahle banaya ja chuka tha

meri fard-e-'amal taKHir se mujh ko mili thi

main jab pahuncha wahan mahshar uThaya ja chuka tha

meri aankhon mein ehsas-e-nazar bharne se pahle

mera manzar mere andar banaya ja chuka tha

sama'at jism ko saunpi gai par is se pahle

hamari ruh ko naghma sunaya ja chuka tha

hamare ism the ma'ruf har mahfil mein hum ko

pahunchne se bahut pahle bulaya ja chuka tha

kisi surat na tha mumkin ki hum bazi palaTte

ghalat jaanib ghalat mohra baDhaya ja chuka tha

safar mein ek maqam aisa bhi aaya tha ki jis par

badan sakit khaDa tha aur saya ja chuka tha

na tha mumkin wahan haalat ko tabdil karna

jahan tariKH ko yaksar bhulaya ja chuka tha

mu'afi ka hua tha qasr-e-shah se hukm jari

magar us waqt 'asim' zahr khaya ja chuka tha