زمیں پر اک مکمل جزو لایا جا چکا تھا

زمیں پر اک مکمل جزو لایا جا چکا تھا

مجھے مجھ سے بہت پہلے بنایا جا چکا تھا

مری فرد عمل تاخیر سے مجھ کو ملی تھی

میں جب پہنچا وہاں محشر اٹھایا جا چکا تھا

مری آنکھوں میں احساس نظر بھرنے سے پہلے

مرا منظر مرے اندر بنایا جا چکا تھا

سماعت جسم کو سونپی گئی پر اس سے پہلے

ہماری روح کو نغمہ سنایا جا چکا تھا

ہمارے اسم تھے معروف ہر محفل میں ہم کو

پہنچنے سے بہت پہلے بلایا جا چکا تھا

کسی صورت نہ تھا ممکن کہ ہم بازی پلٹتے

غلط جانب غلط مہرا بڑھایا جا چکا تھا

سفر میں اک مقام ایسا بھی آیا تھا کہ جس پر

بدن ساکت کھڑا تھا اور سایہ جا چکا تھا

نہ تھا ممکن وہاں حالات کو تبدیل کرنا

جہاں تاریخ کو یکسر بھلایا جا چکا تھا

معافی کا ہوا تھا قصر شہ سے حکم جاری

مگر اس وقت عاصمؔ زہر کھایا جا چکا تھا