zang-aluda riwayat se kya lena hai

zang-ālūda rivāyāt se kyā lenā hai

ham ko farsūda rusūmāt se kyā lenā hai

shart-e-avval hai vafā 'ishq meñ ai jaan magar

chhoḌiye aap ko is baat se kyā lenā hai

milne aa.e haiñ ridā oḌh ke ḳhāmoshī kī

aisī be-kaif mulāqāt se kyā lenā hai

'ishq to 'ishq hai dīvāna-pan is kā sheva

is ko duniyā ke ḳhayālāt se kyā lenā hai

kyoñ ba-zid hai batā tajdīd-e-marāsim ke liye

āḳhirash tujh ko mirī zaat se kyā lenā hai

thī ḳhatā kis kī hue kaise judā ham donoñ

aise derīna savālāt se kyā lenā hai

terī qurbat meñ bayābāñ bhī chaman hai jānāñ

ab mujhe raunaq-e-bāġhāt se kyā lenā hai

ham to 'maz.har' haiñ mohabbat ke mire yaar hameñ

nafrat-o-buġhz-o-fasādāt se kyā lenā hai

zang-aluda riwayat se kya lena hai

hum ko farsuda rusumat se kya lena hai

shart-e-awwal hai wafa 'ishq mein ai jaan magar

chhoDiye aap ko is baat se kya lena hai

milne aae hain rida oDh ke KHamoshi ki

aisi be-kaif mulaqat se kya lena hai

'ishq to 'ishq hai diwana-pan is ka shewa

is ko duniya ke KHayalat se kya lena hai

kyon ba-zid hai bata tajdid-e-marasim ke liye

aaKHirash tujh ko meri zat se kya lena hai

thi KHata kis ki hue kaise juda hum donon

aise derina sawalat se kya lena hai

teri qurbat mein bayaban bhi chaman hai jaanan

ab mujhe raunaq-e-baghat se kya lena hai

hum to 'mazhar' hain mohabbat ke mere yar hamein

nafrat-o-bughz-o-fasadat se kya lena hai