zara si baat ke kya kya bane hain afsane

zarā sī baat ke kyā kyā bane haiñ afsāne

hameñ junūñ hī sahī log kyoñ haiñ dīvāne

paḌe na kaam jahāñ dostoñ se kaam paḌā

vahīñ pe TuuT ga.e muddatoñ ke yārāne

nayā hai ahd marāsim ke haiñ na.e me.aar

badal ga.e haiñ ḳhulūs-o-vafā ke paimāne

pas-e-ġhubār to chehroñ ko ham ne dekh liyā

ye aur baat havāoñ ke ruḳh na pahchāne

gayā vo jalva vo jazba vo mahfileñ bhī ga.iiñ

na ab vo sham-e-farozāñ na ab vo parvāne

kise gumāñ thā ki ban jā.eñge raqīb vahī

vo ḳhair-ḳhvāh jo aate the ham ko samjhāne

hameñ to ḳhair shu.ūr-e-ḳhud-āgahī thā kahāñ

ye kyā ki ahl-e-nazar bhī hameñ na pahchāne

vo jāñ-nisārī-e-bāham vo pās-e-ahd-e-vafā

vo log 'bazm' kahāñ kho ga.e ḳhudā jaane

zara si baat ke kya kya bane hain afsane

hamein junun hi sahi log kyon hain diwane

paDe na kaam jahan doston se kaam paDa

wahin pe TuT gae muddaton ke yarane

naya hai ahd marasim ke hain nae mear

badal gae hain KHulus-o-wafa ke paimane

pas-e-ghubar to chehron ko hum ne dekh liya

ye aur baat hawaon ke ruKH na pahchane

gaya wo jalwa wo jazba wo mahfilen bhi gain

na ab wo sham-e-farozan na ab wo parwane

kise guman tha ki ban jaenge raqib wahi

wo KHair-KHwah jo aate the hum ko samjhane

hamein to KHair shuur-e-KHud-agahi tha kahan

ye kya ki ahl-e-nazar bhi hamein na pahchane

wo jaan-nisari-e-baham wo pas-e-ahd-e-wafa

wo log 'bazm' kahan kho gae KHuda jaane