ذرا سی رات ڈھل جائے تو شاید نیند آ جائے

ذرا سی رات ڈھل جائے تو شاید نیند آ جائے

ذرا سا دل بہل جائے تو شاید نیند آ جائے

ابھی تو کرب ہے بے چینیاں ہیں بے قراری ہے

طبیعت کچھ سنبھل جائے تو شاید نیند آ جائے

ہوا کے نرم جھونکوں نے جگایا تیری یادوں کو

ہوا کا رخ بدل جائے تو شاید نیند آ جائے

یہ طوفاں آنسوؤں کا جو امڈ آیا ہے پلکوں تک

کسی صورت یہ ٹل جائے تو شاید نیند آ جائے

یہ ہنستا مسکراتا قافلہ جو چاند تاروں کا

فرحؔ آگے نکل جائے تو شاید نیند آ جائے