zara zara hi sahi aashna to main bhi hun

zarā zarā hī sahī āshnā to maiñ bhī huuñ

tumhāre zaḳhm ko pahchāntā to maiñ bhī huuñ

na jaane kaun sī āñkhoñ se dekhte ho mujhe

tumhārī tarah se TuuTā huā to maiñ bhī huuñ

tumhī pe ḳhatm nahīñ mehr-o-māh kī gardish

shikast-e-ḳhvāb kā ik silsila to maiñ bhī huuñ

tumheñ manāne kā mujh ko ḳhayāl kyā aa.e

ki apne aap se rūThā huā to maiñ bhī huuñ

mujhe batā koī tadbīr rut badalne kī

ki maiñ udaas huuñ ye jāntā to maiñ bhī huuñ

talāsh apnī ḳhud apne vajūd ko kho kar

ye kār-e-ishq hai is meñ lagā to maiñ bhī huuñ

rumūz-e-harf na haath aa.e varna ai 'ashfāq'

zamāne bhar se alag sochtā to maiñ bhī huuñ

zara zara hi sahi aashna to main bhi hun

tumhaare zaKHm ko pahchanta to main bhi hun

na jaane kaun si aankhon se dekhte ho mujhe

tumhaari tarah se TuTa hua to main bhi hun

tumhi pe KHatm nahin mehr-o-mah ki gardish

shikast-e-KHwab ka ek silsila to main bhi hun

tumhein manane ka mujh ko KHayal kya aae

ki apne aap se ruTha hua to main bhi hun

mujhe bata koi tadbir rut badalne ki

ki main udas hun ye jaanta to main bhi hun

talash apni KHud apne wajud ko kho kar

ye kar-e-ishq hai is mein laga to main bhi hun

rumuz-e-harf na hath aae warna ai 'ashfaq'

zamane bhar se alag sochta to main bhi hun