zard chehra hai mera zard bhi aisa-waisa

zard chehra hai mirā zard bhī aisā-vaisā

hijr kā dard hai aur dard bhī aisā-vaisā

aisī ThanDak ki jamī barf har ik ḳhvāhish par

sard lahja thā koī sard bhī aisā-vaisā

ab use fursat-e-ahvāl mayassar hī nahīñ

vo jo hamdard thā hamdard bhī aisā-vaisā

ya.anī is dhuul ke chhuTne pe bhī ilzām-e-junūñ

koī tūfāñ hai pas-e-gard bhī aisā-vaisā

puurī bastī meñ bas ik shaḳhs se nisbat mujh ko

mujh se munkir hai vo ik fard bhī aisā vaisā

ishq ne rail kī paTrī pe liTāyā jis ko

thā javāñ-mard javāñ-mard bhī aisā-vaisā

kyā tujhe hijr ke āzār batā.e 'komal'

tū to be-dard hai be-dard bhī aisā-vaisā

zard chehra hai mera zard bhi aisa-waisa

hijr ka dard hai aur dard bhi aisa-waisa

aisi ThanDak ki jami barf har ek KHwahish par

sard lahja tha koi sard bhi aisa-waisa

ab use fursat-e-ahwal mayassar hi nahin

wo jo hamdard tha hamdard bhi aisa-waisa

yani is dhul ke chhuTne pe bhi ilzam-e-junun

koi tufan hai pas-e-gard bhi aisa-waisa

puri basti mein bas ek shaKHs se nisbat mujh ko

mujh se munkir hai wo ek fard bhi aisa waisa

ishq ne rail ki paTri pe liTaya jis ko

tha jawan-mard jawan-mard bhi aisa-waisa

kya tujhe hijr ke aazar batae 'komal'

tu to be-dard hai be-dard bhi aisa-waisa