ذرہ حریف مہر درخشاں ہے آج کل

ذرہ حریف مہر درخشاں ہے آج کل

قطرے کے دل میں شورش طوفاں ہے آج کل

صد جلوہ بے حجاب خراماں ہے آج کل

سہما ہوا سا گنبد گرداں ہے آج کل

آنسو میں عکس نقشۂ دوراں ہے آج کل

سمٹا ہوا سا عالم امکاں ہے آج کل

برہم مزاج فطرت انساں ہے آج کل

کس مخمصے میں غیرت یزداں ہے آج کل

قسمت کی تیرگی کی کہانی نہ پوچھیے

صبح وطن بھی شام غریباں ہے آج کل

شیرازۂ امید شکستہ ہے ان دنوں

جمعیت خیال پریشاں ہے آج کل

ہے اک نگاہ مہر کی واصفؔ کو آرزو

واصفؔ کا دل شکستہ و ویراں ہے آج کل