zarre zarre mein yahan raqs-e-numu mera hai

zarre zarre meñ yahāñ raqs-e-numū merā hai

sabz hote hue sahrā meñ lahū merā hai

dar-ba-dar pūchhtā phirtā thā ki maiñ kis kā huuñ

aa.ī aflāk se āvāz ki tū merā hai

parda-e-ġhaib kī lāzim hai hifāzat mujh par

chaak hotā hai magar kaam rafū merā hai

dost is shahr meñ hai sirf mirā ek hī dost

dost is shahr meñ bas ek 'adū merā hai

kyoñ mire dil ne tujhe duur se mahsūs kiyā

kyā tire jism ke andar bhī lahū merā hai

kyā kabhī bhīgte haiñ ruuh ke aa'zā 'āsim'

yā faqat jism kī had tak hī vuzū merā hai

zarre zarre mein yahan raqs-e-numu mera hai

sabz hote hue sahra mein lahu mera hai

dar-ba-dar puchhta phirta tha ki main kis ka hun

aai aflak se aawaz ki tu mera hai

parda-e-ghaib ki lazim hai hifazat mujh par

chaak hota hai magar kaam rafu mera hai

dost is shahr mein hai sirf mera ek hi dost

dost is shahr mein bas ek 'adu mera hai

kyon mere dil ne tujhe dur se mahsus kiya

kya tere jism ke andar bhi lahu mera hai

kya kabhi bhigte hain ruh ke aa'za 'asim'

ya faqat jism ki had tak hi wuzu mera hai