ذرے ذرے میں یہاں رقص نمو میرا ہے

ذرے ذرے میں یہاں رقص نمو میرا ہے

سبز ہوتے ہوئے صحرا میں لہو میرا ہے

در بدر پوچھتا پھرتا تھا کہ میں کس کا ہوں

آئی افلاک سے آواز کہ تو میرا ہے

پردۂ غیب کی لازم ہے حفاظت مجھ پر

چاک ہوتا ہے مگر کام رفو میرا ہے

دوست اس شہر میں ہے صرف مرا ایک ہی دوست

دوست اس شہر میں بس ایک عدو میرا ہے

کیوں مرے دل نے تجھے دور سے محسوس کیا

کیا ترے جسم کے اندر بھی لہو میرا ہے

کیا کبھی بھیگتے ہیں روح کے اعضا عاصمؔ

یا فقط جسم کی حد تک ہی وضو میرا ہے