zarur panw mein apne hina wo mal ke chale

zarūr paañv meñ apne hinā vo mal ke chale

na pahuñche aaj bhī ghar tak mire vo kal ke chale

ye dostī hai ki hai saath aag paanī kā

jo niklī aah to saath ashk bhī nikal ke chale

lahad se laa.ī qayāmat hai paañv paḌ paḌ kar

Thahar Thahar ke chale ham machal machal ke chale

hazāroñ Thokareñ har ik qadam par us meñ haiñ

ye rāh-e-ishq hai kyuuñ kar koī sambhal ke chale

ye mujh ko vasl kī shab haa.e maut kyuuñ aa.ī

hinā lagā ke jo aa.e the haath mal ke chale

tumhārī raah meñ chalne kī hai ḳhushī aisī

ki saath naqsh-e-qadam bhī uchhal uchhal ke chale

mazā to aa.e jo leñ riñd baḌh ke hāthoñ-hāth

mazā to aa.e kahīñ se jo mai ubal ke chale

adā se naaz se chalnā qayāmat un kā thā

jo mal ke dil ko kaleje masal masal ke chale

chale vo sham.a jalāne mazār par kis ke

ki saath saath adū aag ho ke jal ke chale

tumhāre gesu-e-pur-pech ne liyā ham ko

ki muñh meñ saañp ke yā muñh meñ ham ajal ke chale

uThā janāza to bolī ye ḳhāna-bardārī

nayā makān hai kapḌe na.e badal ke chale

hazāroñ daaġh haiñ dil meñ jigar meñ lākhoñ zaḳhm

'riyāz' mahfil-e-ḳhūbāñ se phūl-phal ke chale

zarur panw mein apne hina wo mal ke chale

na pahunche aaj bhi ghar tak mere wo kal ke chale

ye dosti hai ki hai sath aag pani ka

jo nikli aah to sath ashk bhi nikal ke chale

lahad se lai qayamat hai panw paD paD kar

Thahar Thahar ke chale hum machal machal ke chale

hazaron Thokaren har ek qadam par us mein hain

ye rah-e-ishq hai kyun kar koi sambhal ke chale

ye mujh ko wasl ki shab hae maut kyun aai

hina laga ke jo aae the hath mal ke chale

tumhaari rah mein chalne ki hai KHushi aisi

ki sath naqsh-e-qadam bhi uchhal uchhal ke chale

maza to aae jo len rind baDh ke hathon-hath

maza to aae kahin se jo mai ubal ke chale

ada se naz se chalna qayamat un ka tha

jo mal ke dil ko kaleje masal masal ke chale

chale wo shama jalane mazar par kis ke

ki sath sath adu aag ho ke jal ke chale

tumhaare gesu-e-pur-pech ne liya hum ko

ki munh mein sanp ke ya munh mein hum ajal ke chale

uTha janaza to boli ye KHana-bardari

naya makan hai kapDe nae badal ke chale

hazaron dagh hain dil mein jigar mein lakhon zaKHm

'riyaz' mahfil-e-KHuban se phul-phal ke chale