zawal raat par aaya nahin hai Dhal kar bhi

zavāl raat par aayā nahīñ hai Dhal kar bhī

kahīñ na raushnī sūraj ne kī nikal kar bhī

ye log 'ujlat-e-be-fā.ida meñ haiñ masrūf

kahīñ pahuñchte nahīñ tez tez chal kar bhī

ghirī huī haiñ añdhere meñ is tarah āñkheñ

charāġh raushnī karte nahīñ haiñ jal kar bhī

'ajīb baat hai manzil na.ī nahīñ miltī

safar kiyā hai ka.ī rāste badal kar bhī

'araq nichoḌ ke rakhtā hai band raushnī meñ

vo mutma.in nahīñ hotā hai gul masal kar bhī

har ek jism ne miTTī kā Dher honā hai

chale zamīn pe jitnā sañbhal sañbhal kar bhī

daraḳht kāTne kā faisla huā 'āsim'

samar ko chhū na sake log jab uchhal kar bhī

zawal raat par aaya nahin hai Dhal kar bhi

kahin na raushni suraj ne ki nikal kar bhi

ye log 'ujlat-e-be-faida mein hain masruf

kahin pahunchte nahin tez tez chal kar bhi

ghiri hui hain andhere mein is tarah aankhen

charagh raushni karte nahin hain jal kar bhi

'ajib baat hai manzil nai nahin milti

safar kiya hai kai raste badal kar bhi

'araq nichoD ke rakhta hai band raushni mein

wo mutmain nahin hota hai gul masal kar bhi

har ek jism ne miTTi ka Dher hona hai

chale zamin pe jitna sanbhal sanbhal kar bhi

daraKHt kaTne ka faisla hua 'asim'

samar ko chhu na sake log jab uchhal kar bhi