زوال رات پر آیا نہیں ہے ڈھل کر بھی

زوال رات پر آیا نہیں ہے ڈھل کر بھی

کہیں نہ روشنی سورج نے کی نکل کر بھی

یہ لوگ عجلت بے‌ فائدہ میں ہیں مصروف

کہیں پہنچتے نہیں تیز تیز چل کر بھی

گھری ہوئی ہیں اندھیرے میں اس طرح آنکھیں

چراغ روشنی کرتے نہیں ہیں جل کر بھی

عجیب بات ہے منزل نئی نہیں ملتی

سفر کیا ہے کئی راستے بدل کر بھی

عرق نچوڑ کے رکھتا ہے بند روشنی میں

وہ مطمئن نہیں ہوتا ہے گل مسل کر بھی

ہر ایک جسم نے مٹی کا ڈھیر ہونا ہے

چلے زمین پہ جتنا سنبھل سنبھل کر بھی

درخت کاٹنے کا فیصلہ ہوا عاصمؔ

ثمر کو چھو نہ سکے لوگ جب اچھل کر بھی