ذہن جب بے اساس ہوتا ہے

ذہن جب بے اساس ہوتا ہے

شہر کا شہر اداس ہوتا ہے

دس صدی بعد یہ بھی دیکھ لیا

کون یوں نا سپاس ہوتا ہے

آئنے پر جلا نہ ہو تو کہاں

نور کا انعکاس ہوتا ہے

دل میں ابلیس ہو تو دانش پر

جہل کا التباس ہوتا ہے

اس سے ہریالی دور کر دو تو

سبزہ بس زرد گھاس ہوتا ہے

سارے بت نکلیں تب کہیں یہ دل

ایشور کا نواس ہوتا ہے

ایک ہی دوارے جو نوائے سیس

وہ منش سچا داس ہوتا ہے

اس کی مہما کا اور چھور نہیں

داس بن کیوں نراس ہوتا ہے

اک نواگر کا درد بانٹنے کو

چاند بھی آس پاس ہوتا ہے

سوچ کے جسم پر کتاں سے خفی

چاندنی کا لباس ہوتا ہے