zehn ki qaid se aazad kiya jae use

zehn kī qaid se āzād kiyā jaa.e use

jis ko paanā nahīñ kyā yaad kiyā jaa.e use

tañg hai ruuh kī ḳhātir jo ye vīrāna-e-jism

tum kaho to adam-ābād kiyā jaa.e use

zindagī ne jo kahīñ kā nahīñ rakkhā mujh ko

ab mujhe zid hai ki barbād kiyā jaa.e use

ye mirā sīna-e-ḳhālī chhalak uTThegā abhī

mere andar agar ījād kiyā jaa.e use

vo galī pūchhtī hai dar-ba-darī ke ahvāl

haañ to phir vāqif-e-rūdād kiyā jaa.e use

zehn ki qaid se aazad kiya jae use

jis ko pana nahin kya yaad kiya jae use

tang hai ruh ki KHatir jo ye virana-e-jism

tum kaho to adam-abaad kiya jae use

zindagi ne jo kahin ka nahin rakkha mujh ko

ab mujhe zid hai ki barbaad kiya jae use

ye mera sina-e-KHali chhalak uTThega abhi

mere andar agar ijad kiya jae use

wo gali puchhti hai dar-ba-dari ke ahwal

han to phir waqif-e-rudad kiya jae use