zehn mein kaun se aaseb ka Dar bandh liya

zehn meñ kaun se aaseb kā Dar bāñdh liyā

tum ne pūchhā bhī nahīñ raḳht-e-safar bāñdh liyā

be-makānī kī bhī tahzīb huā kartī hai

un parindoñ ne bhī ek ek shajar bāñdh liyā

rāste meñ kahīñ gir jaa.e to majbūrī hai

maiñ ne dāmān-e-darīda meñ hunar bāñdh liyā

apne dāman pe nazar kar mire hāthoñ pe na jā

maiñ ne pathrāo kiyā tū ne samar bāñdh liyā

ghar khulā chhoḌ ke chupke se nikal jā.ūñgā

shaam hī se sar-o-sāmān-e-sahar bāñdh liyā

umr bhar maiñ ne bhī sāhil ke qasīde likkhe

mere bachchoñ ne bhī ik ret kā ghar bāñdh liyā

haar bedard havāoñ se na maanī 'qaisar'

bādbāñ pheñk ke qadmoñ se bhañvar bāñdh liyā

zehn mein kaun se aaseb ka Dar bandh liya

tum ne puchha bhi nahin raKHt-e-safar bandh liya

be-makani ki bhi tahzib hua karti hai

un parindon ne bhi ek ek shajar bandh liya

raste mein kahin gir jae to majburi hai

main ne daman-e-darida mein hunar bandh liya

apne daman pe nazar kar mere hathon pe na ja

main ne pathrao kiya tu ne samar bandh liya

ghar khula chhoD ke chupke se nikal jaunga

sham hi se sar-o-saman-e-sahar bandh liya

umr bhar main ne bhi sahil ke qaside likkhe

mere bachchon ne bhi ek ret ka ghar bandh liya

haar bedard hawaon se na mani 'qaisar'

baadban phenk ke qadmon se bhanwar bandh liya