zer-e-baam gumbad-e-KHazra azan

zer-e-bām gumbad-e-ḳhazrā azaañ

vo bilālī saut vo sāme.a kahāñ

khojtā hai an-ginat masjūd meñ

qul-ho-allāho-ahad kā sā.ebāñ

but-tarāshī chār-sū hai jalva-gar

de ga.ī sab kī jabīnoñ ko nishāñ

yāsiyat ne karb ke dar vā kiye

ḳhushk ummīdoñ kā gulshan hai yahāñ

to rahīn-e-ḳhāna-hā-e-iztirāb

uTh rahā hai tere chilman se dhuāñ

zulmateñ sāya-fagan haiñ har taraf

bām-o-dar par raqs meñ nau-mīdiyāñ

ruk zarā paḌh kalma-e-lā-taqnatū

ḳhud-baḳhud rauzan khuleñge darmiyāñ

hausloñ ke phir se ug ā.eñge par

azm-e-mohkam ko banā le sā.ebāñ

zer-e-baam gumbad-e-KHazra azan

wo bilali saut wo samea kahan

khojta hai an-ginat masjud mein

qul-ho-allaho-ahad ka saeban

but-tarashi chaar-su hai jalwa-gar

de gai sab ki jabinon ko nishan

yasiyat ne karb ke dar wa kiye

KHushk ummidon ka gulshan hai yahan

to rahin-e-KHana-ha-e-iztirab

uTh raha hai tere chilman se dhuan

zulmaten saya-fagan hain har taraf

baam-o-dar par raqs mein nau-midiyan

ruk zara paDh kalma-e-la-taqnatu

KHud-baKHud rauzan khulenge darmiyan

hauslon ke phir se ug aaenge par

azm-e-mohkam ko bana le saeban