zist kaise hasin ho jae

ziist kaise hasīn ho jaa.e

aadmī jab machine ho jaa.e

mutma.in haiñ ḳhulūs se ham to

aap ko bas yaqīn ho jaa.e

ḳhvāhish-e-nafs hai yahī har dam

saath ik nāznīn ho jaa.e

log haiñ be-shumār jab dil meñ

kaise mālik makīn ho jaa.e

ishq nādāñ kā jab huā kāmil

phir koī kyoñ zahīn ho jaa.e

bhar gayā zindagī se dil ab to

maut shāyad muiin ho jaa.e

janm hogā ki maġhfirat hogī

faisla ab mubīn ho jaa.e

koī 'tanhā' ġhazal sunā.e to

ruuh tāza-tarīn ho jaa.e

zist kaise hasin ho jae

aadmi jab machine ho jae

mutmain hain KHulus se hum to

aap ko bas yaqin ho jae

KHwahish-e-nafs hai yahi har dam

sath ek naznin ho jae

log hain be-shumar jab dil mein

kaise malik makin ho jae

ishq nadan ka jab hua kaamil

phir koi kyon zahin ho jae

bhar gaya zindagi se dil ab to

maut shayad muin ho jae

janm hoga ki maghfirat hogi

faisla ab mubin ho jae

koi 'tanha' ghazal sunae to

ruh taza-tarin ho jae