zinda tere baghair bhi rahna paDa mujhe

zinda tire baġhair bhī rahnā paḌā mujhe

is sānahe pe she'r bhī kahnā paḌā mujhe

dil kī muhim ko sahl nahīñ jaan merī jaan

apne bhī ehtijāj ko sahnā paḌā mujhe

zahmat uThānī hotī use aur vaar kī

so us kī ek choT pe Dhahnā paḌā mujhe

fardā kī fikr thī na thā maazī kā kuchh ḳhayāl

aise bhī ek haal meñ rahnā paḌā mujhe

is tarh sun rahā thā koī merī baat ko

kahne kī baat aur hai kahnā paḌā mujhe

ik 'umr tak chalā.e ga.e ḳhuub hāth-pāñv

jab aa.ī merī lahr to bahnā paḌā mujhe

zinda tere baghair bhi rahna paDa mujhe

is sanahe pe she'r bhi kahna paDa mujhe

dil ki muhim ko sahl nahin jaan meri jaan

apne bhi ehtijaj ko sahna paDa mujhe

zahmat uThani hoti use aur war ki

so us ki ek choT pe Dhahna paDa mujhe

farda ki fikr thi na tha mazi ka kuchh KHayal

aise bhi ek haal mein rahna paDa mujhe

is tarh sun raha tha koi meri baat ko

kahne ki baat aur hai kahna paDa mujhe

ek 'umr tak chalae gae KHub hath-panw

jab aai meri lahr to bahna paDa mujhe