زندہ ترے بغیر بھی رہنا پڑا مجھے

زندہ ترے بغیر بھی رہنا پڑا مجھے

اس سانحے پہ شعر بھی کہنا پڑا مجھے

دل کی مہم کو سہل نہیں جان میری جان

اپنے بھی احتجاج کو سہنا پڑا مجھے

زحمت اٹھانی ہوتی اسے اور وار کی

سو اس کی ایک چوٹ پہ ڈھہنا پڑا مجھے

فردا کی فکر تھی نہ تھا ماضی کا کچھ خیال

ایسے بھی ایک حال میں رہنا پڑا مجھے

اس طرح سن رہا تھا کوئی میری بات کو

کہنے کی بات اور ہے کہنا پڑا مجھے

اک عمر تک چلائے گئے خوب ہاتھ پاؤں

جب آئی میری لہر تو بہنا پڑا مجھے