zindan se tere dil ye riha kyon nahin hua

zindāñ se tere dil ye rihā kyoñ nahīñ huā

ho kar judā tū mujh se judā kyoñ nahīñ huā

le aatī us galī kī mahak kaash is taraf

terā guzar ai bād-e-sabā kyoñ nahīñ huā

is dil pe terī chashm-e-karam kyoñ na paḌ sakī

honā thā bār-e-ġham jo 'atā kyoñ nahīñ huā

is baar kyā kamī hai ḳhudā jaane 'ishq meñ

dil kā papīhā naġhma-sarā kyoñ nahīñ huā

kyā ab tire sitam meñ vo shiddat nahīñ rahī

honā thā zaḳhm-e-dil jo harā kyoñ nahīñ huā

pathrā chuke haiñ haath mire de ke dastakeñ

dīvār-e-dil meñ dar tirī vā kyoñ nahīñ huā

kaise ḳhabar huī na use mere ranj kī

honā thā jis ko dil kī davā kyoñ nahīñ huā

puurā huā na kaam to jī ko rahā malāl

jab maslahat khulī to khulā kyoñ nahīñ huā

rahtī thiiñ tujh pe 'ishq kī 'nasrīñ' 'ināyateñ

ab ke karam vo bār-e-ḳhudā kyoñ nahīñ huā

zindan se tere dil ye riha kyon nahin hua

ho kar juda tu mujh se juda kyon nahin hua

le aati us gali ki mahak kash is taraf

tera guzar ai baad-e-saba kyon nahin hua

is dil pe teri chashm-e-karam kyon na paD saki

hona tha bar-e-gham jo 'ata kyon nahin hua

is bar kya kami hai KHuda jaane 'ishq mein

dil ka papiha naghma-sara kyon nahin hua

kya ab tere sitam mein wo shiddat nahin rahi

hona tha zaKHm-e-dil jo hara kyon nahin hua

pathra chuke hain hath mere de ke dastaken

diwar-e-dil mein dar teri wa kyon nahin hua

kaise KHabar hui na use mere ranj ki

hona tha jis ko dil ki dawa kyon nahin hua

pura hua na kaam to ji ko raha malal

jab maslahat khuli to khula kyon nahin hua

rahti thin tujh pe 'ishq ki 'nasrin' 'inayaten

ab ke karam wo bar-e-KHuda kyon nahin hua