zindagani hans ke tai apna safar kar jaegi

zindagānī hañs ke tai apnā safar kar jā.egī

yuuñ ajal kā mo.ajiza ik roz sar kar jā.egī

kyā ḳhabar thī chaah us kī dil meñ ghar kar jā.egī

mujh ko ḳhud mere hī andar dar-ba-dar kar jā.egī

pahle apnā ḳhuuñ to bhar duuñ zindagī kī maañg meñ

jab use jaanā hī Thahrā ban sañvar kar jā.egī

phuul le jā.egī saare toḌ kar ḳhvāboñ ke vo

merī shāḳh-e-zindagī ko be-samar kar jā.egī

aa.egī ik roz vo shab kī siyāhī oḌh kar

merī sub.h-e-zīst ko raushan sahar kar jā.egī

rok lo is dard kī devī se haiñ sab raunaqeñ

ye ga.ī gar ruuTh kar dil ko khañDar kar jā.egī

log kahte haiñ ki vo laḌkī salīqa-mañd hai

aa ga.ī is ghar meñ to is ghar ko ghar kar jā.egī

zindagani hans ke tai apna safar kar jaegi

yun ajal ka moajiza ek roz sar kar jaegi

kya KHabar thi chah us ki dil mein ghar kar jaegi

mujh ko KHud mere hi andar dar-ba-dar kar jaegi

pahle apna KHun to bhar dun zindagi ki mang mein

jab use jaana hi Thahra ban sanwar kar jaegi

phul le jaegi sare toD kar KHwabon ke wo

meri shaKH-e-zindagi ko be-samar kar jaegi

aaegi ek roz wo shab ki siyahi oDh kar

meri subh-e-zist ko raushan sahar kar jaegi

rok lo is dard ki dewi se hain sab raunaqen

ye gai gar ruTh kar dil ko khanDar kar jaegi

log kahte hain ki wo laDki saliqa-mand hai

aa gai is ghar mein to is ghar ko ghar kar jaegi